Geguritan

BUMI NANGIS

Dening : Agustav Triono

Bumi nangis

Luhe netesi lemah pating plethak

Warnane wis ora sumringah

Kemulan apa sing ora mambrah-mambrah

Bumi nangis

Kabeh awake kesumpel runtah

Padha wutah

Kebingkem neng limbah akehe retung

Nglarani bumi ora rampung-rampung

Bumi terus nangis

Ambegane seseg keneng polusi

Sing terus diproduksi

Dening wong-wong ora duwe ati

Bumi terus bae nangis

Luhe nganti garing

Merga panas sing sangsaya danas

Oh, bumi sing arep mati

Slametna sekang polusi

Dadiya menungsa sing duwe ati

Kapetik saka Panjebar Semangat edisi 43

23 Oktober 2010

Manafrase :

            Bumi nangis. Banyu kang tiba saka langit netesi lemah kang monine pating plethak-plethik. Warnane banyu wis ora cerah. Kemulan apa sing ora mambrah-mambrah.

            Bumi nangis. Kabeh daratan lan lautan bumi wis kesumpel sekang runtah. Padha wutah. Katutup saking limbah kang atusan akehe ora kaitung. Nglarani bumi ora rampung-rampung.

            Bumi terus nangis. Kahanan bumi wis seseg keneng polusi. Polusi sing terus diproduksi. Dening wong-wong kang ora duweni ati sing ora gelem ngrawat bumi.

            Bumi asih terus bae nangis. Banyu kang ana ing bumi nganti garing. Merga panas sing terus tambah ganas. Bumi sing arep mati. Slametna sekang polusi. Lan dadiya manungsa kang duweni ati sing gelem ngrawat bumi.